ChatGPT ကို အပတ်စဉ်အသုံးပြုသူ သန်း ၁၀၀ ကျော်ရှိလာပြီဖြစ်ကြောင်း OpenAI ရဲ့ အမှုဆောင်အရာရှိချုပ် Sam Altman က ဆန်ဖရန်စစ္စကိုမြို့ရှိ ကုမ္ပဏီ၏ ပထမဆုံး Developer ကွန်ဖရင့်တွင် တနင်္လာနေ့က ကြေညာခဲ့ပါတယ်။ အဆိုပါနည်းပညာကို လွန်ခဲ့သည့်တစ်နှစ်နီးပါးက ဖြန့်ချိခဲ့ပြီး စတင်ရောင်းချချိန်မှ နှစ်လအတွင်း လစဉ်အသုံးပြုသူ သန်း ၁၀၀ ခန့်ရရှိကာ သုံးစွဲသူကိုအခြေခံတဲ့ တိုးတက်မှုအမြန်ဆုံးစံချိန်ကို တင်ခဲ့ပါတယ်။

Fortune 500 ကုမ္ပဏီများရဲ့ 92% ကျော်အပါအဝင် Developer နှစ်သန်းကျော်ဟာလည်း ဤ Platform ကိုအသုံးပြုကြောင်း Altman က ထိုနေ့မှာမျှဝေခဲ့ပါတယ်။ OpenAI ကုမ္ပဏီက ကြေငြာချက်အသစ်များကို ဆက်တိုက်မျှဝေခြင်းဖြင့် ရည်မှန်းချက်အသစ်များကိုပါ ထုတ်ဖော်ပြောကြားသွားခဲ့ပါတယ်။ ကုမ္ပဏီက ၎င်းရဲ့ အထင်ကရ စာသားထုတ်လုပ်တဲ့ AI မော်ဒယ် GPT-4 ရဲ့ ပို၍အစွမ်းထက်ပြီး ဈေးသက်သာသော ဗားရှင်းဖြစ်တဲ့ GPT-4 Turbo ကိုလည်း ထုတ်ဖော်ပြသခဲ့ပါတယ်။

ထပ်မံပြီး OpenAI က မည်သူမဆို စကားပြောဆိုနိုင်သော AI စနစ်ရဲ့ ကိုယ်ပိုင်ဗားရှင်းကို ဖန်တီးနိုင်တဲ့ GPTs ကိုလည်း ထပ်မံကြေညာခဲ့ပါသေးတယ်။ ကုမ္ပဏီက သုံးစွဲသူများအား “GPT Store” လို့ခေါ် ဆိုတဲ့ စျေးကွက်တစ်ခုတွင် ၎င်းတို့ရဲ့ကိုယ်ပိုင်ဗားရှင်းများကို ဖြန့်ချိစေနိုင်တဲ့ နည်းပညာတစ်ခုကိုလည်း ဖန်တီးပေးသွားမှာဖြစ်ပြီး ထိုနည်းပညာကို အသုံးပြုဖြန့်ချိခြင်းဖြင့် ဝင်ငွေအချို့ ရရှိနိုင်မည်ဖြစ်ကြောင်း ပြောကြားခဲ့ပါတယ်။

ထို့အပြင်၊ OpenAI ရဲ့ text-to-image မော်ဒယ်ဖြစ်တဲ့ DALL-E 3 ကို ChatGPT နှင့် Bing Chat သို့ ပထမဆုံးရောက်ရှိလာပြီးနောက် API မှတစ်ဆင့် ယခုရရှိနိုင်ပြီဟုလည်း ကုမ္ပဏီက ကြေညာခဲ့ပါတယ်။ စိတ်ဝင်စားစရာမှာ OpenAI သည် Developer များအား ၎င်းတို့ရဲ့အက်ပ်များအတွင်း “အေးဂျင့်နှင့်တူသောအတွေ့အကြုံများ” ကို ဖန်တီးပေးမယ့် Assistants API ဟုခေါ်တဲ့ API အသစ်ကို စတင်လိုက်ပါတယ်။ ဤ API ဖြင့်၊ Developer များက ပြင်ပဗဟုသုတများကို အသုံးချတဲ့ “လက်ထောက်” ကို တည်ဆောက်နိုင်ပြီး ၎င်းက လုပ်ငန်းများကို ဆောင်ရွက်ရန် OpenAI မျိုးဆက်သစ် AI မော်ဒယ်များနှင့် ကိရိယာများကို ခေါ်ဆိုနိုင်ပါတယ်။

နောက်ဆုံးအနေနှင့် ကုမ္ပဏီက ရွေးချယ်ရန် ကြိုတင်သတ်မှတ်ထားသော အသံခြောက်ခုနှင့် မျိုးဆက်သစ် AI မော်ဒယ်ဗားရှင်းနှစ်မျိုး ပါရှိတဲ့ text-to-speech API ကို မိတ်ဆက်ခဲ့ပါသေးတယ်။

Reference: Techcrunch

ယခုလို နောက်ဆုံးရ နည်းပညာသတင်းဆောင်းပါးများကို Thetys Facebook Page နှင့် Thetys Myanmar Website တို့တွင် အချိန်နဲ့တပြေးညီ အသေးစိတ် ဝင်ရောက်လေ့လာကြည့်ရှုနိုင်တဲ့အတွက် Like နဲ့ Follow လေးလုပ်ထားဖို့လဲမမေ့ပါနဲနော်…။